女神配對計劃｜T.MAX遭羅毓儀狠派好人卡 IG長文剖白心聲直言唔開心：真係有喊
.
TVB戀愛真人騷《女神配對計劃》由林盛斌（Bob）為五大女神李芷晴、葉蒨文、關嘉敏、梁敏巧、羅毓儀牽紅線，幫助佢哋搵到真愛。其中，較多人討論嘅係葉蒨文和曾展望（GM）呢一對，唔少網民都表示希望佢哋真係拍拖。上周日（27日）播出第8集Dating Camp，女神們與求愛者大玩「心意配對遊戲」，羅毓儀（Yuki）就被指極偏心林俊其（Kris），向海淦清（T.MAX）多次派檸檬，花生團及觀眾都替T.MAX感到心噏。
喺遊戲中，T.MAX多次選中與Yuki相同嘅答案，不過Yuki都情願選擇與另外組別嘅求愛勇者玩遊戲，令T.MAX都掩眼冇眼睇。反而，Kris喺最後一條問題先與Yuki相遇，二人抽中Sit Up遊戲，由Yuki扶着Kris雙腳，並幫忙數次數，Yuki更故意用咬耳仔方式喺Kris耳邊數，極為親密，唔單止Kris怕醜，睇到旁人都覺得甜到入心。Yuki對待T.MAX與Kris嘅行為分別非常大，擺到明對T.MAX落晒閘，佢喺接受製作組訪問時憶述上次被T.MAX壁咚感覺有啲害怕，始終當對方係朋友，更坦言身體最誠實：「我個腦就話揀啦做咩唔揀，但身體有抗拒感覺。」不過，Yuki喺節目尾聲又表示唔想T.MAX被淘汰出局，指二人之間仲有嘢要喺節目中解決，其矛盾做法引起網民熱議，認為Yuki想收兵，力勸佢放生T.MAX。
T.MAX日前於IG撰長文剖白心聲，感激觀眾對佢嘅關心，又透露被Yuki拒絕嘅感受，直言唔開心，但冇嬲：「痛？係真係痛。唔開心？都真係唔開心。喊？都真係有喊。嬲？又真係一啲都冇。」續指，相信Yuki嘅決定：「由我決定要參加呢個節目（講真，真係要好大勇氣），到到要決定踏出呢一步盡全力去追一個人，係因為我相信你！到呢一刻，我仍然相信你嘅決定，你係為我好，你係想保護我，你係對我做左最深思熟慮而又最負責任嘅每一個決定。」T.MAX又大讚Yuki令他成長及學習努力做一個更好、更值得人托付嘅人，但的確需要時間沉澱心情：「無論點都好，我會珍惜同我相遇過，交心過嘅每一個人！所以，我ok呀！係要啲時間沉澱一下嘅，但我知道自己係呢個段經歷入面有所成長！」唔少網民都留言支持T.MAX，表示感受到佢嘅真誠。
