藝人羅毓儀（Yuki）近日因無綫戀綜《女神配對計劃》人氣飆升，她乘勢為派台新歌《

藝人羅毓儀（Yuki）近日因無綫戀綜《女神配對計劃》人氣飆升，她乘勢為派台新歌《女神之翼》到電台受訪。談到當初參加節目，Yuki自言目的是求愛及增加曝光﹕「因為舊年10月拍完劇集《臥底嬌娃》後，已經有幾個月冇任何拍攝，加上舊年年初分手，感覺感情事業同時遇上低潮。有次我同陳瀅去張曦雯屋企玩，咁啱團隊打嚟搵陳瀅參加，陳瀅開住Speaker同佢哋傾，當時我飲咗少少酒就話我想參加。」

Yuki與林俊其配對成功前曾拍過四次拖，她從不相信一見鍾情，擇偶不着重才華或外貌，她指最看重是另一半善良的內心。談及與前度曾高調經營網上頻道，她說：「公司從冇反對拍拖，我就繼續，而我嘅戀愛觀，就好似《女神之翼》嘅歌詞咁，要成為大家的翅膀、互相扶持。（點解分手？）好多因素……可能大家步伐唔一致，前進到有好多落差、期望同失望。好多謝佢一直以嚟嘅陪伴，呢段關係響我生命入面好重要。」

至於林俊其被揭緋聞多多，更被封為「港姐殺手」，Yuki坦言：「打從心底唔介意，每個人都有過去，唔需要考究，Focus過去係冇必要，應該要Focus現在。我有問過佢，但唔代表我介意，純粹想了解大家嘅過去，佢嘅過去可能太擔心另一半感受，一直唔夠膽表達自己，到呢段關係我就畀多啲信心佢，同佢講『我想聽你講嘢，唔好收收埋埋。』」