官方丨龔嘉欣獲選TVB2025下半年度傑出員工
.
TVB剛宣布無綫2025下半年度傑出員工嘉許計劃得獎者，龔嘉欣獲選傑出員工，佢今年主力拍攝綜藝節目，唔只做廚娘拍攝《在家宴客50道菜》、又參與《一日打工限定》接受吸糞通渠大考驗，默默耕耘獲得認同，佢覺得好欣慰。
龔嘉欣接受 TVB娛樂新聞台 訪問時，表示好開心及榮幸獲頒呢個獎，佢覺得能夠成為傑出員工，其中一樣好重要嘅嘢就係每一位同事17年嚟支持同幫忙，龔嘉欣衷心多謝佢哋。
龔嘉欣話今年有好多好難忘嘅工作經歷，年初拍《在家宴客50道菜》係佢首次主持飲食節目，跟住嘗試《一日打工限定》做通渠師傅，而龔嘉欣最近去咗孟加拉做慈善探訪，默默去做每一樣從而獲得大家認同及支持，佢覺得好開心，每個體驗都令佢成長咗好多，呢個獎係佢好寶貴嘅鼓勵同動力，提醒佢要繼續進步，要做好每一個工作。
