由陳豪、張曦雯、馬貫東、丁子朗及劉佩玥等主演的無綫新劇《俠醫》下周推出。除了中醫主題及俠義精神外，此劇還滲透濃濃的港味，其中一場重頭戲更加插大坑夜舞火龍，拍攝時出動了逾200名台前幕後、大坑舞火龍團隊義工、4部攝影機加無人機，於半夜時分封多條街道趕工，認真大陣仗。
劇組及演員事前已花了大量時間綵排，陳豪表示：「火龍插香後差唔多燒45分鐘就會變短，為咗拍出嚟嘅效果靚啲，每45分鐘就要換晒條龍同埋龍珠上面嘅香，辛苦啲工作人員喇。」陳豪舞動70磅龍頭重到「紅都面晒」，舞動時亦發生了小意外：「今次舉龍頭嘅經驗可以話係集合體能、力量同埋技巧，太重嘅關係都試過有一刻握得唔穩、成個龍頭差啲跌落嚟，好彩最後無事咋。」這場舞火龍相當壯觀，陳豪急Call太太陳茵媺及子女前來探班，3位小朋友見到爸爸即變樹熊，相當黐身，陳豪開心表示：「有人提議我一定要帶佢哋嚟感受吓氣氛呀。」
而馬貫東則透露自己舞動的龍珠重約20磅：「我都有試舉過個龍頭，3秒左右已經唔太平衡到，Mo哥真係好勁。」事前花了半日時間練習動作及花式的他，當晚大約舞了4、5小時「龍珠」，翌日仍難逃後遺症：「對手唔係太舉得高。當晚舞到大汗疊細汗，都會驚畀啲跌落嚟嘅香灰辣親，後來就算真係有香灰跌落嚟，都冇太大感覺，因為當時已經成身濕晒，啲香灰畀啲汗整熄咗。」
